*Status for utbygginga våren 2026: Det byrjar roleg - men dreg seg til etter sommaren.*

Sognekraft Produksjon er no i gang med førebuande arbeid i samband med utbygginga av Offerdal kraftverk.

I første omgang er aktiviteten knytt til to område. Det eine er klargjering av riggområde ved Sløbakken på Årdalstangen, der planen er å etablera ein 16-mannsrigg på campingen før sommarferien.

Det er også starta arbeid med utbetring og forsterking av vegnettet i Offerdal, der ein mellom anna ser på forsterking av gamle eksisterande murar. Totalt er det snakk om kring 5–6 kilometer med veg som skal oppgraderast, heilt ned til sjøen. Dette vil vera hovudaktiviteten fram mot sommaren.

*Harald Fimreite er prosjektleiar for utbygginga av Offerdal kraftverk.*

– Det er avgrensa anleggsaktivitet i denne fasen, men ein vil merke noko meir trafikk og maskintransport utover våren. Vegen ned til sjøen vil bli stengt i kortare periodar i samband med dette, seier prosjektleiar Harald Fimreite.

Etter sommarferien er det forventa full anleggsaktivitet for sjølve kraftverksbygginga. Då vil ein større hovudrigg med tilhøyrande kantinerigg koma på plass, i takt med at den meir omfattande anleggsdrifta startar opp.

Sognekraft Produksjon planlegg også eit ope informasjonsmøte på Tangen i løpet av juni. Her vil ein informera nærare om planane for prosjektet, og det vil vera høve til å stilla spørsmål.

– Me ønskjer ein god dialog med lokalsamfunnet, og håpar så mange som mogleg vil ta turen. Me kjem tilbake med meir informasjon når dato er fastsett, seier Fimreite.

Featured