*Thomas Henanger er prosjektleiar for bygginga av Fardalselvi kraftverk.*

Arbeidet med bygginga av Fardalselvi kraftverk går etter planen. Prosjektleiar Thomas Henanger i Sognekraft Produksjon fortel at framdrifta har vore god sidan byggestarten like før årsskiftet.

– Så langt har me klart å halde framdriftsplanen me la på førehand, og eigentleg er alle angrepspunkt på anlegget no i gang, seier Henanger.

Ved kraftstasjonsbygget er første del av betongarbeidet utført, og montasje av ringledning, ventil og innløpsrøyr blei ferdigstilt i starten av oktober. Utover hausten vil betongarbeidet halde fram og stasjonsbygget reise seg. Det gjenstår å leggja dei siste i underkant av 200 meterane av røyrgata, og på inntaket er damveggen ferdig støypt og tappeluke på plass.

Når kraftverket står ferdig vil vatnet bli ført gjennom ei om lag 2,2 kilometer lang nedgravd røyrgate frå inntaket på kote 275 og ned til kraftstasjonen på kote 74, med utslepp om lag 300 meter frå Sognefjorden.

*Kraftverket vil produsera kring 10 GWh årleg når det står klart i 2026.*

Viktige milepælar før vinteren

Målet er å ferdigstille heile røyrgata før vinteren set inn. Deretter vil arbeidet med inntak og stasjon halda fram gjennom vintermånadene.

– Me vil jobba ganske intenst utover vinteren med dei resterande anleggsdelane. Planen er at kraftverket skal stå klart til drift neste vår, seier Henanger.

Med fleire parallelle angrepspunkt og eit erfarent team har prosjektleiinga god tru på at tidsplanen held.

Biletekarusell frå starten av Oktober:

– Me har med oss flinke folk og eit bra lag, så eg trur me skal klara å nå målet om ferdigstilling til våren. Samstundes - bank i bordet for at me ikkje møter uføreseielege hindringar, seier Henanger.

Og legg til:

– Me har også ein god dialog og samarbeid med grunneigarane i Øvstedalen, noko som er avgjerande for god framdrift på prosjektet.

Sjå intervju og dronebilete i video frå litt tidlegare i haust - i september månad:

Fakta om Fardalselvi kraftverk:

• Plassering: Fardal, Sogndal kommune
• Installert effekt: 3,58 MW (peltonturbin)
• Slukeevne: 2100 l/s
• Årleg produksjon: 9,8 GWh (tilsvarande om lag 600 husstandar)
• Konsesjonsløyve gjeve: 2015
• Byggestart: 2025