*Maja Åsmul (23) fekk tilbod om fast jobb etter årets Camp Sognekraft - og takka ja.*

Det blir trongt om dei fire deltakarplassane til neste års Camp Sognekraft. I år som i fjor er det skyhøge søkjartal å melda om – og talet på søkjarar har auka frå 203 til heile 280.

– Me hadde ikkje venta at me skulle passere fjorårets søkjartal, så dette er både gledeleg og litt overraskande. Tala viser at campen verkar å treffe godt blant studentar – og at mange kan tenkja seg ein sommarjobb i Sogn, seier kommunikasjonsrådgjevar i Sognekraft, Ola Skram.

*Dei fire utvalgte studentane av årets Camp Sognekraft gjekk raskt til verks med eit brennande engasjement, og omtalar arbeidet med prosjektoppgåva som både spanande og lærerikt.*

Eit fagleg og sosialt tilbod

Camp Sognekraft er eit fem veker langt prosjektbasert opplegg der fire studentar får bryne seg på reelle utfordringar innan kraftbransjen. Studentane får innblikk i både produksjon, teknologi og berekraft – og får samstundes oppleva korleis det er å bu og arbeida i Sogn.

– Tilbakemeldingane frå dei som var deltakarar i sommar har vore gode, og me veit at dei treivst godt både på og utanfor jobb. Ein viktig faktor for det sosiale miljøet har vore etableringa av Sognacamp, som i likskap med Camp Sognekraft gjekk av stabelen for første gong i år, seier Skram.

Sognacamp er eit fagleg og sosialt tilbod for sommarjobbdeltakarar i ulike bedrifter i Sogn. Aktivitetane skjer etter arbeidstid i vekedagane og i helgane, og gjev deltakarane høve til å bli kjende med andre unge som jobbar i regionen – og til å oppleva noko av det beste Sogn har å by på.

NTNU-studenten Maja Åsmul deltok i årets Camp Sognekraft og har takka ja til fast stilling i konsernet. Ho fortel om ein unik sommar – der kombinasjonen av faglege oppgåver og sosiale opplevingar gav eit positivt innblikk av livet både på arbeidsplassen og i regionen.

– Det var ein lærerik og spennande sommar der me fekk fagleg utvikling og innsikt i ein spanande bransje. Sognacamp bidrog definitivt til å gjera opphaldet endå kjekkare, då me vart meir samansveisa og vart kjend med andre på tvers av bedriftene - samstundes som me også fekk erfara meir av alt det kjekke spennande som Sogn har å tilby, seier ho.

Ønskjer å nå breiare ut mot lokalt næringsliv

I likskap med Camp Sognekraft vil også Sognacamp bli arrangert til neste år. Campen hadde ni bedrifter med på laget og samla til saman 35 deltakarar. Prosjektleiar for Sognacamp Henrik Skyttermoen i Sogn Næring fortel at tilbakemeldingane frå deltakarar og bedriftar involverte har vore både konstruktive og jamt over positive.

– Me trur at dette er eit tiltak som både gjev ein betre totaloppleving – fagleg og sosialt – og som samtidig set Sogn på kartet. Gjennom aktivitetar og ekskursjonar får me vist fram mykje av det beste regionen har å by på, seier han.

Ei nettside med førebels program er allereie oppe og gå. No blir det jobba med å få med fleire bedrifter inn mot neste sommar.

– Me ser eit stort potensial for å byggja vidare på det som er etablert, og håpar endå fleire verksemder i regionen vil bli med. Dette handlar ikkje berre om å tilby ein sommarjobb, men om å bidra til rekruttering og omdømebygging for heile Sogn, seier Skyttermoen.

Featured