Atle Terum er ny styreleiar i Sognekraft-konsernet

Sognekraft har fått fleire endringar i konsernstyret etter årets generalforsamling. Atle Terum er vald som ny styreleiar, etter at Geir Arve Sandvik no går av etter fem år i rolla som styreleiar.

Terum har brei erfaring frå styrearbeid og næringsliv, blant anna som styreleiar i Sogn Sparebank. Han kjenner kraftbransjen godt, og er no rådgjevar i bransjen, etter lang fartstid som revisor.

– Sognekraft er eit konsern med høg gjennomføringsevne, sterk lokal forankring og ambisjonar for framtida. Gjennom aktivitetane sine spelar konsernet ei avgjerande rolle i utviklinga av Sogn, og bidreg til synergiar i heile regionen, seier Terum.

– Eg skal gjera mitt for å bidra til at Sognekraft held fram med å vera ei drivkraft i Sogn, legg han til.

Takk til avtroppande styreleiar

Geir Arve Sandvik blei takka av som styreleiar under generalforsamlinga som fann stad like før fellesferien. Sandvik har vore styremedlem i Sognekraft sidan 2009 og styreleiar sidan 2020.

– Det har skjedd enormt mykje i konsernet dei siste åra. Eg er stolt over utviklinga og kvar Sognekraft står i dag, sa Sandvik i si avslutning.

Grethe Hjetland og Gunn Cecilie T. Hundere går også ut av styret. Inn kjem Trine Lerum Hjellhaug, dagleg leiar i Lerum AS, og advokat og partnar Silje Flugheim Heggestad frå Advokatfirmaet Tollefsen.

– Me takkar Geir Arve, Grethe og Gunn Cecilie for innsatsen gjennom ei viktig tid i konsernet, og ser fram til å jobbe med godt saman med det nye styret, seier konsernsjef Terje Bakke Nævdal.

Featured